قبل ما ترمي فكر

من أكثر المشروعات التي تجذبني مشروعات اعادة التصنيع ليست فقط على مستوى اعادة تصنيع الورق والبلاستك وعلب البيبسي وخلافه لكن ان تحول شي "مايسوى" الى "يسوى" فإن كنت ممن يمتلك موهبه فنية وقدره إبداعيه فكر قبل ماترمي . أختي الصغيره كان عندها "لزمه" بمعنى جمله دائماً تكررها ورغم اني كنت استخدمها دائماً بغرض "الافتزاز" فأحمل كل شيء "لايسوى على الأطلاق " لأطلق عليه جملتها الشهيره " ممكن نعمل بي عمل فني " لكن بنظره اخرى للجمله التي تحمل في أعماقها مشروع اعادة التصنيع ممكن كثير من مخلفاتنا اليوميه ابتداء من عود الايس كريم الى "العفش" القديم يتحول لعمل فني او شي مفيد. مره في برنامج جابو شاب حول الكفرحق السياره لكرسي مره شكلو واو ووحده حولت نجفة قديمه لنجفة مره ستايل حتى الله يكرمكم المخلفات واحد في نيوورك قعد يجمع بعضها وحطها في زجاجه وسار يبيعها ب 10$ بس عاد زجاجه شيك بداخلها شي من معالم نيوورك واهلها (: . زجاج السياره المكسور مره حطينا حولين صوره عمل شكل مره جيد والأمثله كثيره . من ناحية أخرى اعادة التصنيع مهم للمحافظة على البيئه في اليابان مثلاً كل نوع من المهملات لي سلته الخاصه من الورق للعلب المعدينه الى اخره . ايام المدرسه افتكر كنا بعد ما نمسح نجمع الي يطلع من المحايه لين سارت كميه كبيره عملنا بيها لوحه حتى باقي بري المرسام والألوان الخشبيه واعواد الايس كريم وخلافه تطلعنا منها أعمال فنيه. لو طاولتك قديمه قبل لا ترميها حاول تلعب فيها شويه لونها اصبغها اطبع عليها صوره غيرها يمكن تطلع بحاجه خطيره ، لو عندك مثلا اطار صوره قديمه زيد فصوص وشوية تباتيك يطلع معاك شي شيك . لو ساعه قديمه غير الجلده ولمعها تطلع معاك جديده ، اوصال قماش تتلصق مع بعض تطلع لوحة كولاج . صراحه نفسي اجمع الناس في حوش كبير واعمل مسابقه وكل واحد يجيب معاه شي يحس مالي قيمه ونحاول نخلق منو شي جديد ومبتكر .