فرحة التخرج حلوه وفرحة العمل والنجاح احلى واحلى وتحقيق الهدف لا تعادلها حلاوه
من كل دي الخطوات خليني في خطوة الشغل
اتخرجنا بامتياز وفرحنا بالشهاده
وجينا ندور على الوظيفه
وحده زي تحبي التصميم التصوير والاعلاانات
طبيعي حتتوجه لوكالات الدعايه
وما ادراك ما وكالات الدعايه
طبعا كلها كرفتات ومرحبا
وشلونك دي غير مرغوب فيها
حتى لو كنت فنان
مانبغه نشوف لاطرحتك ولا عبايتك
طبعا انواع الاحباط الي تعتريك
ويقابلك حائط الحل الاخير
مكتوب عليه اقبل بالنصيب وبالي يجيك يصير
تمسكت بدي القاعده لكن لم استطع القبول
فكيف اعمل في شي لا احبه ولا اضمن نجاحي فيه
مشي حالك
المهم فجأه كده بعد المغرب يدق الجوال
من شركه ولا عمري رسلتلها السي في ولا عمري سمعت فيها
المهم مقابله سهله ولزيزه
وتاني يوم داومت
ومن جد استمتعت
لكن عشنها يادوب جديده
تأخرت الرواتب وبدأت الحاله تسير كسيفه
طبعا انا عتبر اعلى راتب في الشركه الصغنونه المصونه
وكنت رئيسة القسم الي مافي احد غيري
لوووووووول
بس والله كانت بسطه ياهو
الفكره انو بعد ما خرجت منها
رجعنا للف والحوسه
كلها كرفتات ومرحبا ومايبغو عبايه يبغو على طول يشوفو البلوزه
فقلت يابت مدام البلد مقفلتها
والبعثات مفتوحه
ونفسك تدرسي بره من زمان ياطموحه
قومي سافري وادرسيلك لغه وخدي شهاده علده مزبوطه
وجيت على امريكا شيكا بيكا
وطبعا حاسه اني في جده بس من غير عبايه
شله جداويه 100%
ماتحس بفرق كبير غير انو حبيبتي جده ماليها مثيل
المهم موضوع الغربه وجده والهرجه دي كلها موضوع تاني كبير
لكن نرجع للموضع الخطير
فينك ياشغل ؟
دحين الفكره
لمن ارجع بلغه وديك الشهاده المعتبره
هل حلاقي مرحبا في استقبالي
ولا حلاقي وظيفه عدله زي الي في بالي
ولاتجيني رزقه وافتح مشروع لحالي
من جد شي يقلق يحير يحوس ويلخبط يشعببك
دا وانا بنت
الله يعينكم يااولاد
3 comments:
جلست كم دقيقة أحاول أستوعب ايش يعني كرفتات, تطلع في الأخير جمع كرفته :o
خطوة ممتازة انك كملتي دراستك, فرص انك تلاقي وظيفة أسهل دحين, خصوصا انو ماشاء الله عندك خبرة فهدا يدعم السيفي..
ييه سفرتيني للمستقبل, سنة و يسير موضعك همي, بس برضو نحن أخف من الشباب, هما لازم يشتغلو يبغوا و لا ما يبغوا, نحن ما عندنا هدا الضغط و لو انو متطلبات الحياة اليوم أتغيرت..
الله يعين!
loooooooooooooooooool
u r right but if u didn't find the right(husband) u will still looking 4 work
Post a Comment